ഇന്ത്യയിലെ ഡിജിറ്റല് ഇടപാടുകളുടെ എണ്ണത്തില് വന് വര്ധനവുണ്ടാകുമ്പോള്, അതോടൊപ്പം തന്നെ സൈബര് തട്ടിപ്പുകളും ഉയര്ന്ന തോതില് ഉയരുന്നതായി പുതിയ റിപ്പോര്ട്ട്. യുപിഐ, നെറ്റ് ബാങ്കിങ് എന്നിവ വഴിയുള്ള തട്ടിപ്പുകള് കണ്ടെത്തുന്നത് കൂടുതല് വെല്ലുവിളിയായി മാറിയിരിക്കുകയാണെന്നും ഇന്ത്യ ടുഡേയുടെ റിപ്പോര്ട്ടില് പറയുന്നു. രാജ്യത്തെ ഡിജിറ്റല് സമ്പദ്വ്യവസ്ഥ അതിവേഗം വളരുമ്പോള്, സൈബര് കുറ്റവാളികള് കൂടുതല് നൂതനമായ മാര്ഗങ്ങളാണ് തട്ടിപ്പിനായി ഉപയോഗിക്കുന്നത്.
പണമിടപാടുകള്ക്കായി ജനം വ്യാപകമായി യുപിഐ ഉപയോഗിക്കുന്നത് തട്ടിപ്പുകാര്ക്ക് വലിയ അവസരമാണ് നല്കുന്നത്. വ്യാജ പേയ്മെന്റ് ലിങ്കുകള്, ക്യുആര് കോഡ് തട്ടിപ്പുകള് എന്നിവ വഴി പണം അപഹരിക്കപ്പെടുന്നു. ഏറ്റവുമൊടുവില് ആര്ട്ടിഫിഷ്യല് ഇന്റലിജന്സ്, ഡീപ് ഫേക്ക് സാങ്കേതിക വിദ്യകള് ഉപയോഗിച്ച് ആളുകളെ കബളിപ്പിക്കുന്ന സംഭവങ്ങള് പോലും റിപ്പോര്ട്ട് ചെയ്യപ്പെടുന്നുണ്ട്. ഇത് തിരിച്ചറിയുക എന്നത് സാധാരണ ഉപഭോക്താക്കള്ക്കും സുരക്ഷാ ഏജന്സികള്ക്കും ഒരുപോലെ ബുദ്ധിമുട്ടായി മാറുന്നു.
ബാങ്കുകള് സുരക്ഷാ സംവിധാനങ്ങള് ശക്തമാക്കുന്നുണ്ടെങ്കിലും, ഉപഭോക്താക്കളെ സാമൂഹികമായി സ്വാധീനിച്ചുള്ള തട്ടിപ്പുകള് തടയുക എന്നത് വലിയ വെല്ലുവിളിയാണ്. കെവൈസി അപ്ഡേറ്റ് എന്ന വ്യാജേന വരുന്ന ലിങ്കുകളും കോളുകളും ഇതില് പ്രധാനമാണ്. ഡിജിറ്റല് ഇടപാടുകള് നടത്തുമ്പോള് ഉപഭോക്താക്കള് അതീവ ജാഗ്രത പാലിക്കണമെന്ന് വിദഗ്ധര് മുന്നറിയിപ്പ് നല്കുന്നു. അപരിചിതമായ ലിങ്കുകളില് ക്ലിക്ക് ചെയ്യാതിരിക്കുക, ഒടിപി കൈമാറാതിരിക്കുക തുടങ്ങിയ അടിസ്ഥാന സുരക്ഷാ പാഠങ്ങള് പാലിക്കേണ്ടത് അത്യാവശ്യമാണ്.
ഡിജിറ്റല് വിപ്ലവം ഇന്ത്യയെ വലിയ പുരോഗതിയിലേക്ക് നയിക്കുമ്പോഴും, സുരക്ഷിതമായ ഇടപാടുകള് ഉറപ്പാക്കാന് കൂടുതല് ബോധവല്ക്കരണവും ശക്തമായ നിയമനടപടികളും ആവശ്യമാണെന്ന് റിപ്പോര്ട്ട് ചൂണ്ടിക്കാണിക്കുന്നു.
Content Highlights: India's digital payments boom has a growing fraud problem